எந்தக் குழந்தையும் நல்ல குழந்தைதான் மண்ணில் பிறக்கையிலே!

எந்தக் குழந்தையும் நல்ல குழந்தைதான் மண்ணில் பிறக்கையிலே! அவர் நல்லவராவதும் தீயவராவதும்… வளர்ப்பு நட்பு இவற்றால்தான். இன்றைய இளைய தலைமுறைஒரு சில மாற்றங்களைச் செயல்படுத்தினால் உலக அரங்கில் நம் பலம் மேலும் ஓங்கும்.

தமது பெற்றோரின் வருமானத்தை அறிந்து அதற்கேற்ப சிரமம் கொடுக்காதவாறு படிக்கவும் செலவின் சிக்கனமும், பண்பாட்டில் பிடிப்பும் கட்டாயம் வேண்டும். தாய் மொழியில் உரையாடும் துணிச்சல் தேவை. தமிழ்நாட்டில் நன்கு தமிழ் பேசத் தெரிந்த இருவர் கூட ஆங்கிலத்தில் உரையாடுவது வருத்தமளிக்கிறது. மொழி என்பது கருத்தொடராக வருவதால் தான், தாய்மொழி எனக் கூறப்படுகிறது. தாய்மொழியில் உரையாடினால் மற்றவர்கட்கு புரியாது என்ற நிலையில் பிறமொழியில் பேசுவதை வழக்கமாய் கொள்ள வேண்டும்.

தமிழ் மொழியின் தனிச்சிறப்பு சொல்லித் தெரிய வேண்டியதில்லை. அம்மாவின் சகோதரனை – மாமா என்றும், சகோதரியை சின்னம்மா என்றும், அப்பாவின் சகோதரனை சித்தப்பா என்றும், சகோதரியை அத்தை என்றும் பல உறவுப் பெயர்களில் அழைக்கிறோம். ஆனால் ஆங்கிலத்தில் ஆண்டி (Aunty) என்றும் அங்கிள் (Uncle) என்றும் எல்லோரையும் அழைக்கின்றோம்.

“யாமறிந்த மொழிகளிலே தமிழ்

மொழிபோல் இனிதாவதெங்கும் காணோம்”

என்ற பாரதி வாக்கு உண்மையே.

தாய் வழி வாழ்க்கை வாழும் நம் இளைஞர்கள் தாய் மொழியிலேயே பேச விரும்ப வேண்டும்.

மழை வெள்ளம் சேதப்படுத்தாமலிருக்க அணை கட்டி தேக்கி வைத்து முறையாகப் பயன் படுத்துவது போல், இளைஞர் பலம் விரையமாகாமல், மேல் நாட்டு பண்பாடற்ற கலாச்சாரத்துக்கு அடிமையாகாமல் இருக்க கல்வி நிறுவனங்கள் பாடங்களைப் போதிப்ப துடன் நல்ல பழக்கங்களையும் ஒழுக்கமான வாழ்க்கை நெறிகளையும் பயிற்றுவிக்க வேண்டும்.

உலக நாடுகளில் நம் நாட்டு இளைஞர் பலம் ஒப்புவகை இல்லாதது. கடந்து வந்த பாதையை அடிக்கடி நினைவுகூர்ந்து, இன்றைய நல்ல நிலையில் மற்றவர்கட்கு இயன்றஅளவு உதவும் அன்பர்கள் எண்ணிக்கை நாளுக்கு நாள் அதிகரித்து வருவது பெருமைப்பட வேண்டிய செய்தி.

பெற்றோர்களும் தம் வீட்டு இளைஞர்கட்கு நல்ல வழிகாட்டி, சரியான பாதையில் பயணத்தை தொடரச் செய்ய வேண்டும். இன்றைய சிறார்கள் தான் நாளைய இளைஞர்கள் என்பதால் அவர்கட்கு நல்ல பழக்கங்களை கற்பிப்போம். இதற்கு இயற்கை வளமும் துணையாக இருப்பதை இனி பார்ப்போம். வாழ்க வளமுடன்

தெய்வம் என்ன செய்கிறது?

நமக்கு உள்ளேயும், வெளியேயும் நிகழ்கின்ற செயல்கள் அனைத்தும் தெய்வத்தின் செயல்கள் அல்ல என்றே வைத்துக் கொள்வோம்.

இரவில் தாயின் அருகே படுத்து உறங்கும் குழந்தை, திடீரென கண் விழிக்கிறது. அப்போது சுற்றும் முற்றும் சூழ்ந்திருக்கிற இருளைக் கண்டு அது அச்சம் அடைகிறது. அச்சம் தோன்றியதும் உடனே அதற்குத் தாயின் நினைவு வருகிறது. அந்தத் தாய் எங்கே இருக்கிறாள் என்று தன் கைகளால் தடவிப் பார்க்கிறது. அவள் தன் அருகிலேயே படுத்திருக்கிறாள் என்பதைக் கண்டதும் அது அச்சம் நீங்கி ஆறுதல் அடைகிறது. அப்போது அந்தத் தாய் என்ன செய்துவிட்டாள்? அவள் ஒன்றுமே செய்யவில்லை. அந்தக் குழந்தை கண் விழித்ததோ அல்லது கைகளால் அது தன்னைத் தடவிப் பார்த்ததோ எதுவுமே அவளுக்குத் தெரியாது. அவள் தன்னையும் தன் குழந்தையையும் மறந்தவளாய் உறங்கிக்கொண்டுதான் இருந்தாள் என்றாலும் அவள் தன் அருகில் இருக்கிறாள் என்ற உணர்வு ஒன்றே, குழந்தையின் அச்சத்தைப் போக்கி அதற்கு ஆறுதலை அளித்து விட்டது.



இது மாதிரி,



‘தெய்வம் நமக்கு எதுவுமே செய்ய வேண்டாம்; தெய்வம் நமக்குத் துணையாக இருக்கிறது’ என்ற உணர்வு ஒன்றே நம்முடைய அச்சங்களைப் போக்கும் ஆறுதலை நமக்கு அளிக்கும்!

மாற்று எரிபொருள் ஆராய்ச்சி!

ஒவ்வொரு முறை பெட்ரோல் மற்றும் டீஸல் விலை ஏறும் போது கவலைப்படுவது உலக மக்களின் வழக்கமாகி விட்டது.

தனிப்பட்ட முறையில் வாகனங்களுக்காக - அது மோட்டார் சைக்கிள், ஸ்கூட்டர் ஆனாலும் சரி, காரானாலும் சரி- அதிக பணத்தைச் செலவழிக்க வேண்டியதாக இருக்கிறது. லாரி போன்ற வாகனங்கள் கறிகாய் உள்ளிட்ட ஏராளமான பொருள்களை ஏற்றிச் செல்வதால் அந்தப் பொருள்களின் விலையும் அபரிமிதமாக ஏறி விடுகிறது.

வாகனங்கள் கக்கும் கார்பன் டை ஆக்ஸைடு மற்றும் கார்பன் மானாக்ஸைடு உள்ளிட்ட நச்சுப் புகையால் நகரின் வளி மண்டலம் வெகுவாகப் பாதிக்கப்படுகிறது.

குளோபல் வார்மிங் எனப்படும் புவி வெப்பமாதலுக்கு இந்த வாகனங்களின் நச்சுப்புகையே முக்கிய காரணம். அட்லாண்டிக் மகாசமுத்திரத்தின் நேர் மேலே ஓஸோன் படுகையில் பெரிய துளை இந்த புவிவெப்பமாதலால் ஏற்பட்டு விட்டது.

இதனால் உலக மக்களுக்கு பெரும் அபாயம் ஏற்பட்டிருக்கிறது. தோல் வியாதிகள் உள்ளிட்ட பல்வேறு வியாதிகள் தோன்ற ஆரம்பித்து விட்டன.

கடலில் அரை டிகிரி செல்ஸியஸ் வெப்பம் உயர்ந்ததால் கடல் வாழ் உயிரினங்கள் அழிந்து விடும் ஆபத்திற்குத் தள்ளப்பட்டுள்ளன.

ஆகவே பெட்ரோல், டீஸல் போன்ற எரிபொருளுக்கு சுற்றுப்புறச் சூழலைக் கெடுக்காத மாற்று ஏற்பாடை ஆராய்வது இன்றைய சூழ்நிலையில் அவசியமாகி விட்டது.

உலகில் 174 கோடி வாகனங்கள் இன்று ஓடுகின்றன. இவற்றிற்கு அன்றாடம் பெட்ரோல் மற்றும் டீஸல் போட்டு கட்டுபடியாகவில்லை. உலகில் உள்ள எண்ணெய்க் கிணறுகள் தோண்டித் தோண்டி சுரண்டப்பட்டு வற்றி வருகின்றன. இன்னும் 40 ஆண்டுகளில் ஒரு சொட்டு பெட்ரோல், டீஸல் இல்லாத நிலை உலகில் ஏற்பட்டு விடும்!

இந்த நிலை ஏற்பட்டால் உலகில் உள்ள அனைத்து போக்குவரத்து சாதனங்களும் செயல் இழக்கும்! ஸ்கூட்டர், மோட்டார்சைக்கிள், கார், லாரிகள், டீஸலால் இயக்கப்படும் ரயில்கள், பெட்ரோலால் இயங்கும் விமானங்கள் உள்ளிட்ட அனைத்தும் நின்று போனால் உலகின் இயக்கமே ஸ்தம்பித்து விடும்!

பெட்ரோல் மற்றும் டீஸலை அனைவரும் ஏன் நாடுகின்றனர்? இதற்கு முக்கியமாக மூன்று காரணங்கள் உள்ளன.

முதலாவது காரணம்:- அதில் எனர்ஜி டென்ஸிடி எனப்படும் ஆற்றல் அடர்த்தி மிக அதிகம் உள்ளது. பெட்ரோல் ஆற்றலை உடனடியாகத் தருகிறது.

இரண்டாவது காரணம்:- ஓரிடத்திலிருந்து இன்னொரு இடத்திற்கு அதைக் கொண்டு செல்வது மிகவும் சுலபம். பைப்புகள் மூலமாக ஓரிடத்திலிருந்து இன்னொரு இடத்திற்கு பெட்ரோல் விரைவாகவும் சுலபமாகவும் எடுத்துச் செல்லப்படுகிறது. லாரிகள், பெட்ரோல் போகிகள் மூலமாகவும் துரிதமாக பெட்ரோல், டீஸலைக் கொண்டு செல்ல முடிகிறது.

மூன்றாவது காரணம்:- மற்ற எரிபொருளை விட எண்ணெயை சுலபமாகவும் அதிகமாகவும் இன்று பெற முடிகிறது.

நிலத்தடியிலும் ஆழ்கடல் அடியிலும் மறைந்திருக்கும் இந்த எண்ணெயை அதி நவீன அறிவியல் உபகரணங்கள் சுலபமாகக் கண்டுபிடித்து மேலே எடுத்து வர வழிவகை செய்கின்றன. பின்னர் இது சுத்திகரிக்கப்படுகின்றது.

கச்சா எண்ணெயை கறுப்புத் தங்கம் என்று சொல்கிறோம். பணத்தை அள்ளித் தரும் கச்சா எண்ணெய் இருக்கும் நாடுகள் எண்ணெய் வள நாடுகள் என அழைக்கப்படுகின்றன. அரபு நாடுகளின் செல்வக் கொழிப்புக்கு இந்த கறுப்புத் தங்கமே காரணம்!

ஆக, இந்த நிலையில் எண்ணெய் இல்லாத சூழ்நிலை ஏற்படப் போவதைக் கருத்தில் கொண்டு மாற்று எரிபொருளைக் கண்டுபிடித்துப் பயன்படுத்த வேண்டுமானால் அப்படிப்பட்ட மாற்று எரிபொருள் அதிக ஆற்றலை உடனடியாகத் தருவதாகவும் அதிக அளவில் கிடைக்கக் கூடியதாகவும் கிடைக்கும் இடத்திலிருந்து இன்னொரு இடத்திற்கு சுலபமாகவும் விரைவாகவும் கொண்டு செல்லக் கூடியதாகவும் இருக்க வேண்டும். அத்தோடு விலை குறைவாகவும் இருந்து சுற்றுப்புறச் சூழ்நிலையைக் கெடுக்காத ஒன்றாக இருந்தால் மிகப் பெரிய வரபிரசாதமாகிவிடும்.

இந்த மாற்று எரிபொருள் ஆராய்ச்சியில் ஈடுபட்ட விஞ்ஞானிகள் ஏராளமானவற்றைக் கண்டுபிடித்துள்ளனர். எதினால் என்பது கரும்பிலிருந்து எடுக்கப்படும் மாற்று எரிபொருள். லிக்விபைட் பெட்ரோலியம் கேஸ் (எல்.பி.ஜி), கம்ப்ரெஸ்ட் நேச்சுரல் கேஸ் (சி.என்.ஜி), எலக்ட்ரிக் கார்கள், ஹைப்ரிட் கார்கள், ஹைட்ரஜன் கார்கள், சோலார் பவர் வாகனங்கள் என ஏராளமானவை கண்டுபிடிக்கப்பட்டுள்ளன.

இந்த நூற்றாண்டின் மிகப் பெரிய அறிவியல் அதிசயமாக இருக்கப் போவது ஹைட்ரஜன் கார் தான்!

அடுத்த 40 வருடங்களில் உலக மாற்றங்கள்

சமகால ஆய்வு, பிரதான செய்தி

புதிய வருடம் தொடங்கி விட்டதால் ஆய்வு நிறுவனங்கள் சுறுசுறுப்பாக இயங்கத் தொடங்கியுள்ளன மேற்குலகில் வருடத் தொடக்கத்தில் ஆய்வாளர்கள் வெளியிடும் அறிக்கைகள் நல்ல வரவேற்புப் பெறுகின்றன. காத்திரமான ஆய்வுகளின் அடிப்படையில் எதிர்காலத் திட்டமிடல் நடத்தப்படுகிறது.

அல்வின் ரொவ்லர் (ALVIN TOFFLER) 1970 களில் எதிர்கால அதிர்ச்சிகள் (FUTURE SHOCKS)என்ற தலைப்பில் ஒரு நூல் எழுதினார் அந்த நூலில் அவர் பட்டியலிட்ட எதிர்வு கூறல்கள் அப்படியே நடந்துள்ளதாகப் பார்வையாளர்கள் தெரிவிக்கின்றனர் உலகச் செய்திகள் படுவேகமாக அனைத்து நாடுகளுக்கும் பரவும் என்ற அவருடைய கூற்று அப்படியே நிறைவேறியதால் அவர் சொல்வதை நம்புவதற்கு உலகம் தயாரகி உள்ளது.

எதிர்கால அதிர்ச்சிகள் என்ற தனது நூலில் ஆண்களை ஆண்களும் பெண்களைப் பெண்களும் திருமணம் செய்வதற்கு அனுமதி வழங்கும் சட்டங்கள் மேற்கு நாடுகளில் இயற்றப்படும் என்று கூறினார் வாடைகைத் தாய் மார்களை அமர்த்தி அவர்களுக்குத் தமது விந்தணுக்களைச் செயற்கை முறையில் செலுத்தி மகப் பேற்றையும் அடைவார்கள் என்றும் தெரிவித்தார்.

கட்டுக் கதை போல் இருந்த இந்த எதிர்வு கூறல்கள் இன்று நடை முறையில் காணக் கூடியதாக இருக்கிறது ரொவ்லர் கூட்டமைப்பு (TOFFLER ASSOCIATES) என்ற நிறுவனம் உருவாக்கப்பட்டு வருடத் தொடக்க எதிர்வு கூறல்கள் வெளிவரத் தொடங்கியுள்ளன.

அண்மையில் வெளிவந்த சில முக்கிய எதிர்காலம் பற்றிய அறிவிப்புக்களைப் பார்ப்போம். உலக விவகாரங்களில் பெண்களின் ஆதிக்கம் கூடுதலாக இருக்கும். ஆண்கள் தமக்கென்று ஒதுக்கிய துறைகளில் பெண்கள் பெரும் எண்ணிக்கையில் நுளைவார்கள் இதனால் அரசியல், பொருளாதார, சமூக, விஞ்ஞான மாற்றங்கள் ஏற்படும்.

உலக மக்கள் தொகையில் ஐந்தில் ஒரு பங்கினரான இஸ்லாம் மதத்தினர் மேற்கு நாடுகளில் குடியேறுவார்கள் எவ்வளவு முயன்றாலும் இதைத் தடுக்க முடியாது அரசுகளின் கொள்கைகள், சட்டங்கள், சமூக நலன் திட்டங்களில் இதன் மூலம் மாற்றங்கள் ஏற்படும்

உணவு. தொழிற்சாலை ஆக்கங்கள், எரிபொருள் போன்ற வற்றை கடல் பாதை மூலம் நகர்த்தும் கடற்கலங்கள் மிகப் பெரியதாகவும் வேகமாகச் செல்லக் கூடியதாகவும் மாற்றியமைக்கப் படும் இது துறைமுகங்களைப் பெரிதாக்க வேண்டிய தேவையை உருவாக்கும்.

மேலும் இந்தப் பாரிய கடற் கலங்களின் நகர்வுக்கும் பொருத்தமாகச் சுயெஸ் கால்வாய் பனாமா கால் வாய் ஆகியன பெருப்பிக்க வேண்டிய கட்டாயம் ஏற்படும். மலாக்கா நீரிணைக்கு மாற்றீடாகத் தாய்லாந்திற்கும் மலேசியாவுக்கும் இடையிலுள்ள ஒடுங்கலான தரைப் பரப்பில் புதிய கால்வாய் தோண்ட வேண்டி வரும்.

கிரா (KRA) என்ற பகுதியில் புதிய கால்வாய் தோண்டுவதற்கான ஆய்வுகள் நடத்தப்படுகின்றன. இந்தத் திட்டம் நிறைவேறினால் மலாக்கா நீரிணை மூலம் முக்கியத்துவம் பெறும் சிங்கப்பூர் துறைமுகம் வீழ்ச்சி அடையும்

உலக ஒழுங்கிற்குக் (WORLD ORDER) கட்டுப்படாத நாடுகளின் எண்ணிக்கை அதிகளவில் குறையும் ஈரான் வட கோரியா போன்ற நாடுகள் உலக ஒழுங்கிற்கு கட்டுப்படக் காலம் எடுக்கும்

உலகின் பொருளாதார வல்லரசாகச் சீனா வளர்ச்சி அடையும் சீனாவின் யுவான் நாணயம் அமெரிக்காவின் டாலரை வீழ்த்தி விடும்.

சீனாவின் பொருளாதார ஆதிக்கம் காரணமாக வல்லரசாக வரத்துடிக்கும் இந்தியா, பிறேசில் வெனசுவெலா போன்ற நாடுகள் சீனாவுடன் கூட்டுச் சேர வேண்டி வரும்.

உலகின் அதி முற்போக்கான தொழில் நுட்பத் தேவைகளுக்கு வேண்டிய கனிம வளங்களில் கிட்டத்தட்ட 90 விகிதமானவை சீனாவில் காணப்படுகின்றன. மிகுதி அவுஸ்திரேலியா, அமெரிக்கா ஆகியவற்றில் உள்ளன இதனால் சீனாவின் ஆதிக்கம் இன்னும் அதிகரிக்கும்.

எண்ணை, எரிவாயு போன்ற வற்றால் செல்வந்த நாடுகளாகிய சவுதி அரேபியா, ருஷ்யா, வளை குடா நாடுகள், வெனசுவெலா, ஈரான், ஈராக் போன்றவை மாற்று எரிபொருள் மற்றும் சூரிய சக்திப் பயன்பாடு, கடல் அலை மூலம் மின்சாரத் தயாரிப்பு. காற்றாடி மின்சாரம் என்பனவின் பரவலான பயன்பாட்டில் நிதி வருவாய் இழப்பைச் சந்திக்க நேரிடும்.

பூமி வெப்பமடைதல் தொடர்வதால் கடல் மட்டம் உயரும் சிறிய தீவுகள் கடலில் மூழ்கும் கரையோரங்கள் காணமற் போகும் வடதுருவப் பனிப்பாறைகளின் மறைவால் அப்பகுதியில் பெரும் நிலப்பரப்பபு கடல் மட்டத்திற்கு மேல் உயர்ந்து நிற்கும் அதற்கு உரிமை கோரும் நோர்வேயும் ருஷ்யாவும் செல்வாக்குப் பெறுவது நிட்சயம்.

கணினிப் பாவனை கூடுதலாகும் பெத்தாபைற் வேகத்தில் இயங்கும் சுப்பர் கணினிகள் மலிவான விலையில் பொதுமக்களுக்குக் கிடைக்கும் கணினிகளில் சேமிக்கப் படும் தகவல்களின் அளவும் எண்ணிக்கையும் எல்லை கடந்து செறிந்துள்ளதால் அவற்றை முழ அளவில் பயன்படுத்த உலக மக்களால் முடியாது.

மல்துஸ் (MALTHUS)என்ற சமூகவியலாளர் மக்கள் தொகை உயரும் போது உணவு மற்றும் குடிநீர்த் தட்டுப்பாடு ஏற்படும் என்று எதிர்வு கூறினார். அவருடைய கூற்றைப் பொய்ப்பிக்கும் விதத்தில் உணவுத் தயாரிப்பும் கடல் நீரைக் குடிநீர் ஆக்கும் திடடமும் விரிவாக்கப்படும்.

ஐரோப்பாவின் சிறிய தரைப்பரப்பு நாடுகளான சுவிற்சர்லாந்து, சுவிடன், பெல்ஐpயம், நெதர்லாந்து, அவுஸ்திரியா போன்றவை பின்னடைவுகளைச் சந்திக்க நேரிடும் தமது பொருளாதார உபாயங்களை மாற்றியமைக்க இவை பெரிய நாடுகளின் உதவியை நாடலாம்.

உணவு உற்பத்தியிலும் ஏற்றுமதியிலும் சுப்பர்- பவர்களாக (SUPER_POWERS) அமெரிக்காவும் கனடாவும் முன்னிலையில் இருக்கப் போவது நிட்சயம் கடல் மட்டம் உயர்வதால் கோடிக் கணக்கான மக்கள் தமது வாழ்விடங்களில் இருந்து இடம் பெயர நேரிடும் இது உலகம் எதிர்நோககும் மிகப் பெரிய வருங்காலப் பிரச்சனையாக இருக்கும்.

மாற்று எரிபொருள் இருக்க பெட்ரோல் இறக்குமதி ஏன்?

"எத்தனால்" இது கரும்பு, மக்காசோளம், போன்றவற்றில் இருந்து தாயாரிக்கப்படுகிறது.

இதை பெட்ரோலுக்கு பதிலாக மாற்று எரிபொருளாக உபயோகிக்கலாம்.

இன்னும் சொல்லப்போனால் இது பெட்ரொலை விட சிறந்தது என்றே சொல்லாம். அதுமட்டுமல்லாது இதன் விலையோ மிக குறைவு.

பெட்ரோல், டீசல் விலையைக் கட்டுக்குள் வைக்கும்பொருட்டு பிரேசிலில் 1927-ம் ஆண்டே எத்தனால் வாகன எரிபொருளாக விற்பனை செய்ய ஆரம்பித்துவிட்டது.

1942-43-ல் எத்தனால் உற்பத்தி 16,000 டன்னாக இருந்தது. இன்று 2.5 கோடி டன்னாக உயர்ந்துள்ளது. 2019-ல் உற்பத்தியை 5 கோடி டன்னாக உயர்த்தத் திட்டமிட்டுப் பணிகள் நடந்து வருகின்றன.

உலகிலேயே கரும்பு உற்பத்தியில் பிரேசில் முதல் இடத்திலும், இந்தியா இரண்டாவது இடத்திலும் உள்ளது. ஆனால் இன்றைய இந்தியாவில் "எத்தனால்" உற்பத்தி 4,80,000 டன்தான்.

"எத்தனால்" உற்பத்தியைப் பெருக்குவதற்கு மத்திய அரசு எந்த முயற்சியையும் எடுக்கவில்லை. ஆனால், மாதமொரு முறை பெட்ரோல், டீசல் விலையை மட்டும் உயர்த்தத் தவறுவதில்லை.

எத்தனால் உற்பத்தியைப் பெருக்கும் பொருட்டு 1982-லேயே தமிழ்நாட்டிலுள்ள ஒரு தனியார் நிறுவனம் தமிழக அரசுக்கு விண்ணப்பித்துள்ளது. இன்றுவரை அந்தக் குழுமத்துக்கு தமிழக அரசு அனுமதி வழங்கவில்லை.

பிரேசிலில் ஒவ்வொரு பெட்ரோல் பங்கிலும் "எத்தனால் பம்ப்" தனியாக இருக்கும். வாகன ஓட்டிகள் தங்கள் விருப்பப்படி பெட்ரோலுடன் "எத்தனாலைக்" கலந்து கொள்ளலாம். "எத்தனாலில்" மட்டுமே ஓடும் வாகனங்களும் உண்டு.

"எத்தனாலின்" விலையும் லிட்டர் ஒன்றுக்கு ரூ. 20 தான். இது மட்டுமன்றி, "எத்தனால்" அல்லது பெட்ரோலில் ஓடும் வாகன என்ஜின்களையும் உற்பத்தி செய்கின்றனர். மற்ற நாடுகளைப் பார்த்தாவது இந்தியா திருந்துமா என்பது விடை காண முடியாத கேள்வி.

24% பெட்ரோலுடன் எத்தனால் கலந்து வாகனத்தில் எந்த மாற்றமுமின்றி வாகனத்தை ஓட்டலாம். வாகனத்தின் திறன் கூடுமேயொழியக் குறையாது. 85% எத்தனாலுடன் 15% பெட்ரோல் மட்டும் கலந்து உபயோகிக்கலாம்.

அமெரிக்காவில் ஒரு லிட்டர் எத்தனால் உற்பத்தி செய்து கொடுத்தால் உற்பத்தியாளருக்கு ஒரு லிட்டருக்கு ரூ. 6 அமெரிக்க அரசு இனாமாக வழங்குகிறது. 2022-ல் 11 கோடி டன் எத்தனால் உற்பத்தி செய்ய இலக்கு நிர்ணயித்து பணிகள் அமெரிக்காவில் நடைபெற்று வருகின்றன.

இவ்வளவு வாய்ப்புகள் இருந்தும் அவைகளைப் பயன்படுத்தாமல் கச்சா எண்ணெய் இறக்குமதி செய்வதிலேயே அரசு ஆர்வம் காட்டி வருகிறது. இதன் மர்ம முடிச்சுகளை அவிழ்த்தால் இந்தியாவில் 2ஜியை விட மிகப்பெரிய பூகம்பம் வெடிக்கும்.