ராஜஸ்ரீ

🌹"காதலிக்க நேரமில்லை" படத்தி்ல் அனுபவம் புதுமை பாடல், "குடியிருந்த கோயில்" படத்தில் எம்ஜிஆருடன் வாள் நடனம், என பல்வேறு படங்களில் நடித்து புகழ்பெற்றவர் ராஜஸ்ரீ.. பாமா விஜயம் படத்தில் ஒரு நடிகையாகவே தோன்றி நடித்திருப்பார்..

🌹பூம்புகாரில் நடனமங்கை மாதவியாக, தன்னுடைய நடிப்பு முத்திரையை பதிவு செய்தவர்.. இப்படி, தமிழ், தெலுங்கு, மலையாளம் இந்தி ஆகிய மொழிகளில் நடித்து, பிரபலமானவர் ராஜஸ்ரீ.. எனினும் பெரும்பாலும் கவர்ச்சி் நடனம்தான் இவரது பிரதான சினிமா பங்களிப்பாக இருந்திருக்கிறது.

🌹இவருடைய உருவத்தை உருவகமாகக்கொண்டு, கவிஞர் வாலி ஒரு பாட்டு எழுதினார்.. அதுதான், "மதுரையில் பறந்த மீன் கொடியை உன் கண்களில் கண்டேனே" என்ற பாடல்.. தலைமுதல் கால் வரை ராஜஸ்ரீயை வருணித்தே அனைத்து வரிகளும் அதில் இடம்பெற்றிருக்கும்..

🌹தெலுங்கு தாய்மொழி என்பதால், இவருக்கு தமிழ் எழுத படிக்க வராது.. கடந்த 1978 க்குப் பிறகு எங்கும் எந்த மொழியிலும் நடிக்கவில்லை. கடைசியாக நாளை நமதே படத்தில் நடித்திருந்தார்.. ஒரு அரசியல்வாதியுடன் 1978 ல் திருமணம் நடந்துள்ளது.. ஒரு ஆண் குழந்தை பிறந்து, 4 வயது ஆரம்பிக்கும் போதே, இவரது கணவர் மாரடைப்பால் காலமாகி விட்டார்.. முழுமையாக 5 ஆண்டுகள் கூட இவரது இல்லறம் நீடிக்கவில்லை..

🌹திருமணம் செய்யும்போது, "இனிமேல் எப்பவுமே நீ சினிமாவில் நடிக்கக்கூடாது" என்று இவரது கணவர் ராஜஸ்ரீயிடம் சத்தியம் வாங்கிக் கொண்டாராம்.. அதனால்தான், அவருக்கு கொடுத்த வாக்குறுதிபடி, இன்று வரை சினிமாவிலோ தொலைக்காட்சியிலோ கூட நடிக்காமல் உள்ளார் ராஜஸ்ரீ.

🌹சினிமாவில் நடித்துவந்த ராஜஸ்ரீ, திடீரென காணாமல் போய்விட்டார்.. சாய்பாபாவின் பக்தையோ, எங்கே ஓரிடத்தில் வெளி உலகத்துக்கே தெரியாமல் வாழ்ந்திருக்கிறார்.. ஆனால், அவர் எங்கே இருக்கிறார் என்றே யாருக்கும் தெரியவில்லை.. சென்னையிலா, ஆந்திராவிலா? அல்லது உயிருடனே கூட இல்லையா? என சினிமா உலகில் யாருக்கும் தெரியாமல் இருந்திருக்கிறது.. ஒருநாள், கர்நாடக சேனல்களில் ராஜஸ்ரீ பாட்டுக்களை தொடர்ந்து ஒலிபரப்பி வந்திருக்கிறார்கள்..

🌹இதனை பெங்களூரில் இருந்த சரோஜாதேவி கவனித்துள்ளார்.. எதுக்காக ராஜஸ்ரீ பாடல்களை திடீரென நாள் முழுக்க ஒலிபரப்புகிறார்கள்? என்று பதறிப்போனார்.. அவருக்கு என்ன நேர்ந்ததோ என்ற கலவரத்துடன், சென்னையிலுள்ள நல்லி குப்புசாமியை தொடர்பு கொண்டு, ராஜஸ்ரீ பற்றி விசாரித்து சொல்லும்படி கேட்டுள்ளார்.

🌹நல்லி குப்புசாமியும் ஆட்களை அனுப்பி, பல இடங்களில் விசாரித்து, கடைசியில், சினிமாவைவிட்டு ஒதுங்கி, தி.நகரில் ராஜஸ்ரீ வசிப்பதை கண்டு பிடித்திருக்கிறார்கள்.. அதற்கு பிறகுதான், சரோஜாதேவிக்கு நிம்மதியானதாம்.

🌹மறைந்த முதல்வர் ஜெயலலிதாவின் வீட்டுக்கு சென்று, தன்னுடைய மகனின் திருமணத்துக்கும் அழைப்பு தந்துவிட்டு வந்தார்.. தற்போது இவரது ஒரே மகன் அமெரிக்காவில் வசித்தாலும், சென்னை தி.நகர் வீட்டில், சினிமா வாடையே இல்லாமல் தனியாக வசித்து வருகிறார் ராஜஸ்ரீ...

அனிருத் ரவிச்சந்திரன் - காவ்யா மாறன் திருமணம் !

  இசையமைப்பாளர் அனிருத் ரவிச்சந்திரன் - காவ்யா மாறன் திருமணம் கிரீஸ் நாட்டில் நவம்பர் 11ஆம் திகதி நடைபெற உள்ளது.

அனிருத் ரவிச்சந்திரன் - காவ்யா மாறன் திருமணம்

பிரபல இசையமைப்பாளர் அனிருத் ரவிச்சந்திரன் மற்றும் SRH அணி உரிமையாளர் காவ்யா மாறனுக்கு திருமணம் நடைபெற உள்ளதாக நீண்ட நாட்களாக தகவல் பரவி வந்த தற்போது திருமணம் உறுதி செய்யப்பட்டுள்ளது. 

சன் டிவி குழுமத்தின் தலைவர் கலாநிதி மாறன் - காவேரி கலாநிதி ஆகியோர் நேற்று தெலங்கானா முதல்வர் ரேவந்த் ரெட்டியை சந்தித்து திருமண வரவேற்பிற்கான அழைப்பிதழை வழங்கினர்.  

மேலும், தமிழ்நாடு முதலமைச்சர் விஜய்க்கும் அழைப்பிதழ் வழங்கியுள்ளனர். அப்போது மணமகன் அனிருத்தும் உடனிருந்தார். 

நெருங்கிய குடும்பத்தினர் மற்றும் நண்பர்கள் பங்கேற்கும் திருமண நிகழ்ச்சி வரும் நவம்பர் 11ஆம் திகதி க்ரீஸ்(Greece) நாட்டில் நடைபெற உள்ளது.

அதைத்தொடர்ந்து, நவம்பர் 21 ஆம் திகதி முக்கிய பிரமுகர்கள் பங்கேற்கு வகையில், திருமண வரவேற்பு நிகழ்ச்சி சென்னை நட்சத்திர ஓட்டலில்  ஏற்பாடு செய்யப்பட்டுள்ளது. இதில், அரசியல் தலைவர்கள், திரைத்துறையினர், தொழிலதிபர்கள் உள்ளிட்ட பல முக்கிய பிரமுகர்கள் கலந்து கொள்வார்கள். 

காவ்யா மாறன், சன் டிவி குழுமத்தின் தலைவர் கலாநிதி மாறன் - காவேரி கலாநிதி தம்பதியின் ஒரே மகள் ஆவார்.

மேலும், முன்னாள் முதல்வர் கருணாநிதியின் கொள்ளுப்பேத்தி மற்றும் முன்னாள் மத்திய அமைச்சர் முரசொலி மாறனின் பேத்தி ஆவார்.

35 வயதான காவ்யா மாறன் சென்னை ஸ்டெல்லா மேரிஸ் கல்லூரியில் இளங்களை பட்டமும், இங்கிலாந்து வார்விக் பிசினஸ் ஸ்கூலில் முதுகலை பட்டமும் பெற்றுள்ளார்.

தொலைக்காட்சி, ரேடியோ, செய்தித்தாள், DTH மற்றும் சினிமா ஆகியவற்றை உள்ளடக்கிய, சன் குழுமத்தில் நிர்வாக இயக்குநராகவும், சன்ரைசர்ஸ் ஹைதராபாத், சன்ரைசர்ஸ் ஈஸ்டர்ன் கேப், சன்ரைசர்ஸ் லீட்ஸ் ஆகிய அணிகளின் தலைமை நிர்வாகியாகவும் உள்ளார்.

36 வயதான அனிருத் ரவிச்சந்திரன் நடிகர் ரவி ராகவேந்திரா மற்றும் நடன கலைஞர் இலட்சுமியின் மகன் ஆவார். நடிகர் ரவி ராகவேந்திரா ரஜினிகாந்தின் மனைவி லதா ரஜினிகாந்தின் சகோதரர் ஆவார்.    

மதிய விருந்து ! ட்ரீட் கொடுக்க பணம் வேண்டும்

கல்லூரி மாணவி ஒருவர் தன் நண்பர்களுக்கு ட்ரீட் கொடுக்க அப்பாவிடம் பணம் கேட்டார். அப்பா, ‘‘எவ்வளவு வேண்டும்?’’ என்று கேட்டார். ‘‘ஐந்து பேர் போகிறோம். 4 ஆயிரம் ரூபாய் கொடுங்கள்’’ என்றார் மகள்.

‘வெளியே சென்று செலவழிப்பதற்கு இவ்வளவு பணம் தேவையா?’ என்று வியந்த அப்பா, ‘‘என்னிடம் இப்போது இல்லை. ஒரு வாரம் பொறுத்துக்கொள். தருகிறேன்’’ என்று சொன்னார். மகள் அதை ஏற்றுக் கொள்ளவில்லை. ‘‘எனக்கு இப்போதே பணம் வேண்டும்’’ என்று கேட்டார்.

‘‘அவ்வளவு தொகையை ஒருநாள் மதிய விருந்துக்கு செல வழிப்பதில் எனக்கு உடன்பாடு இல்லை. உன் படிப்புக்கு எவ்வளவு செலவாகிறது என்று உனக்கே தெரியும். நம் குடும்ப நிலைமையை மீறித்தான் உன் படிப்பு செலவை கவனித்துக் கொண்டிருக்கிறோம். அவசியமானதற்கு செலவழிக்கலாம். ஆனால், ட்ரீட் என்ற பெயரில் அனாவசிய செலவு செய்வதில் எனக்கு உடன்பாடில்லை. ஆனால் நீ இந்தக் காலத்துப் பெண். உன் விருப்பத்தையும் மறுக்க என்னால் முடியாது. ஆகையால் குறைந்தது மூன்று நாட்களாவது பொறுத்துக் கொள்’’ என்று அப்பா சொன்னார்.

மகள் அதை ஏற்காமல் பதிலுக்குப் பேச, அப்பா அதற்கு விளக்கம் கொடுக்க, அது காரசாரமான விவாதமாகி விட்டது. கடைசியில் மகள், ‘‘நான் யாருக்கும் ட்ரீட் கொடுக்கலை. ஆனா நான் மட்டும் யாராவது ட்ரீட் கொடுத்தா வெட்கமே இல்லாம நல்லா தின்னுக் கிறேன். இப்ப உங்களுக்குத் திருப்தியா?’’ என்று கண்ணீரோடு சொல்லிவிட்டு பைக்கை எடுத்துக் கொண்டு வெளியே போனார். அப்பாவின் குரல் பின்னால் கேட்க, அதை அலட்சியம் செய்துவிட்டு வெளியே போனார்.

நகரத்தில் இலக்கே இல்லாமல் சுற்றிக் கொண்டிருந்தார். அவசரத்தில் மொபைல் போனையும் எடுத்து வரவில்லை. அது மாலைப் பொழுது ஆனதால் மக்கள் நடமாட்டம் அதிகரித்திருந்தது. இங்கும் அங்கும் சுற்றியதில் பசித்தது. பைக்கை ஒரு டீக்கடை அருகே நிறுத்தினார். பெரிய சாலையின் ஓரம் பெரிய நடைபாதை. நடைபாதையை ஒட்டி டீக்கடை இருந்ததால் பலர் அந்நடை
பாதையில் நின்று கொண்டு பொறுமையாக டீ குடிக்க வசதியாய் இருந்தது. இவர் ஒரு டீயும் வடையும் வாங்கிக் கொண்டார்.

அப்போது அங்கே மூன்று ஆட்டோக்கள் வந்து நின்றன. ஒவ்வொரு ஆட்டோவிலும் ஆண்களும் பெண்களுமாய் பலர் நெருக்கயடித்து அமர்ந்திருந்தனர். அவர்கள் அனைவரும் வசதியான குடும்பத்தினர் என்று அவர்கள் பேசுவதை வைத்துத் தெரிந்து கொண்டாள்.

அதில் ஓர் இளைஞன் உற்சாகமாய் டீக்கடையில் வந்து தட்டு தட்டாக சமோசாக்களும், உளுந்து வடைகளும் வாங்கி வாங்கி ஆட்டோவில் இருப்பவர்களுக்கு கொடுத்துக் கொண்டிருந்தான். சட்னியை அவர்கள் இருக்கும் இடத்துக்கே எடுத்து வந்து ஊற்றினான். சமோசாக்களுக்கு தொட்டுக்கொள்ள சாஸ் தேவைப்பட்டபோது எடுத்து வந்து ஊற்றிக் கொண்டிருந்தான். அவர்கள் அரட்டையடித்தபடி சாப்பிட்டார்கள்.

எல்லோரும் சாப்பிட்டபிறகு அந்த இளைஞன் பணம் கொடுத்தான். 500 ரூபாய்க்கும் குறைவாகவே ஆகியிருந்தது. கிட்டத்தட்ட 15 பேருக்கு 500 ரூபாய்க்குள் அவன் ட்ரீட் வைத்ததை பார்த்து ஆச்சர்யப்பட்டாள். ஆனால் அவர்கள் அனைவரும் உற்சாகமாய் இருந்தார்கள்.

‘பணம் செலவழிப்பதற்கும், நண்பர்கள் மற்றும் உறவினர்களிடையே உற்சாகமாய் இருப்பதற்கும் சம்பந்தம் இல்லை’ என்பதை அவர் புரிந்து கொண்டார். ‘எவ்வளவு செலவழிக்கிறோம் என்பது முக்கியமில்லை. அதை எப்படி ஆழ்மனதில் இருந்து ரசித்து செலவழிக்கிறோம் என்பதுதான் முக்கியம்’ என்பதையும் உணர்ந்தார். ‘நண்பர்களுக்கு பெரிய உணவகத்தில்தான் ட்ரீட் வைக்க வேண்டும் என்று போலித்தனமான கௌவுரவம் பார்த்து அப்பாவை வேறு மனக்கஷ்டப்படுத்தி விட்டோமே’ என்று வருந்தினார்.

அவசரமாக வீட்டுக்குத் திரும்பியவர், பைக்கை நிறுத்திவிட்டு அப்பாவிடம் ஓடிச் சென்றார். மகளைப் பார்த்து பதறிய அப்பா, ‘‘எங்கம்மா போனே? கவலைப்படாதே! நீ கேட்ட பணம் ரெடி பண்ணிட்டேன். ஆனா இனிமே எப்பவுமே இப்படி கோபத்துல பைக்கை எடுத்துக்கிட்டு கிளம்பாதே. அப்பாவுக்கு ரொம்ப பயமா இருக்கு’’ என்றார். அவர் அப்படிச் சொல்லும்போது ஒரு குழந்தையாகத் தெரிந்தார்.

‘‘இல்லப்பா! ட்ரீட்டுக்கு இவ்வளவு பணம் வேணாம். நான் என் ஃப்ரெண்ட்ஸை வீட்டுக்குக் கூப்பிடப் போறேன். நானே சமைச்சி நம்ம வீட்டு மொட்டை மாடில நண்பர்களுக்கு விருந்து வைக்கப்போறேன்’’ என்ற மகளை ஆச்சர்யத்துடன் பார்த்தார் அப்பா.

‘உலகம் இவளுக்கு ஏதோ நல்லதாய் கற்றுக் கொடுத்திருக்கிறது’ என்று நினைத்துக் கொண்டார். ‘‘சாப்பிடுங்கப்பா, ருசியா இருக்கு’’ என்று அப்பாவுக்காக வாங்கி வந்திருந்த சமோசாவை நீட்டினார் அந்த அன்பு மகள்.

படித்தத்தில் பிடித்தது

காதல் வாழ்க்கை !

 

♥முதல் இரவில், அவள் தன் கணவனின் பர்ஸை திறந்து பார்த்தாள்... அதில் தன்னை விட அழகான ஒரு பெண்ணின் புகைப்படம் இருந்தது.

♥அவள் ஒரு கணம் திகைத்தாலும், அதைப் பார்த்ததாக காட்டிக்கொள்ளவில்லை...

மாறாக அவனுடன் மகிழ்ச்சியாகவே இருந்தாள்.

♥அடுத்த நாள், சிலரின் கதைகளிலிருந்து அவள் தெரிந்து கொண்டாள், கணவனின் பலமான முன்னைய காதல் வாழ்க்கையைப் பற்றி...

♥குடும்பத்தினரின் கட்டாயத்திற்காக, அந்த பாவமான பெண்ணை விட்டுவிட்டு, தன்னைத் திருமணம் செய்து கொண்டதாக...

♥அவளுக்கு வருத்தமாக இருந்தாலும், அதை அவள் பெரிதாக எடுத்துக் கொள்ளவில்லை...

அவள் நல்ல மனதுடன் அவனைக் காதலிக்கத் தொடங்கினாள்...

அவனின் பல கஷ்ட நேரங்களிலும் அவள் கரம் பிடித்து நின்றாள்...

♥அவனுடைய வெறுப்புகள் மெதுவாக மெதுவாக மறைந்தன...

சில நாட்களுக்குப் பிறகு, அவள் முற்றத்தை சுத்தம் செய்யும் போது கிழிந்த ஒரு புகைப்படத்தின் துண்டுகள் கிடைத்தன... அவள் அதை ஒட்டி வைத்தபோது, அவளால் நம்ப முடியவில்லை, அது கணவனின் பர்ஸில் இருந்த முன்னால் காதலியின் புகைப்படம்...

♥அவள் ஓடிச் சென்று தூங்கிக் கொண்டிருந்த கணவனை எழுப்பாமல், அவனுடைய பர்ஸை திறந்து பார்த்தாள்... அதில் அந்த அழகான பெண்ணின் புகைப்படத்திற்கு பதிலாக, தன் கருப்பான முகம்... அவள் அந்த பர்ஸை மார்போடு அணைத்துக் கொண்டாள்...

♥"காதலை வலுக்கட்டாயமாகப் பெற முடியாது... அது மனதில் உணர்ந்து கொள்ள வேண்டிய ஒன்று...

அதற்கு அழகை விட நல்லது குணமே..."

♥பொறுமையாக காத்திருப்பதும்... தெளிவாக நடந்து கொள்வதும், காதலிப்பதும், அந்த காதலுக்கு முன் முகம் திருப்ப முடியாது...

♥அந்த புகைப்படத்தை பார்த்தவுடன் கத்தி கூச்சல் போட்டு பிரிந்து சென்று இருந்தால் இன்று இப்படி ஒரு அன்பான தம்பதிகள் இருக்கமாட்டார்கள்.

ரஜினி என்றும் சூப்பர் ஸ்டார் !

 

1982 லேயே ரஜினிக்கு இந்தப் பாடலை எழுதியவர்  பஞ்சு அருணாச்சலம் தான்.. 

 அந்தப் பாடல் தான்  .............

 

"பொதுவாக எம்மனசு தங்கம்.. ஒரு போட்டியின்னு வந்துவிட்டா சிங்கம்"

 

இதுமட்டுமல்ல 1977ல் வெளிவந்த "புவனா ஒரு கேள்விக்குறி" தொடங்கி 1994ல் வெளிவந்த "வீரா" வரை ரஜினியின் பெரும்பாலான சூப்பர் ஹிட் பாடல்களை எழுதியவர் பஞ்சு அருணாச்சலம் தான் என்பது பலரும் அறியாதது... தெளிவான பட்டியல் தயாரித்தால் இன்னும் நிறைய பாடல்கள் இடம்பெறும்.. உதாரணத்திற்காக சில மிக மிக பிரபலமான பாடல்கள் மட்டும்.

 

கண்மணியே காதல் என்பது கற்பனையோ

 

காதலின் தீபம் ஒன்று

 

விழியிலே மலர்ந்தது

 

ராஜா என்பார் மந்திரி என்பார்

 

பொதுவாக எம்மனசு தங்கம்

 

பேசக்கூடாது வெறும் பேச்சில் சுகம்

 

கொஞ்சி கொஞ்சி அலைகள் ஓட

 

தென்மதுரை வைகைநதி

 

முத்தமிழ்க் கவியே வருக முக்கனிச் சுவையும் தருக

 

மானின் இரு கண்கள் கொண்ட மானே

 

மாசி மாசம் ஆளான பொண்ணு

 

ஏய் பாடல் ஒன்று ராகம் ஒன்று

 

இதில் ஒரு சுவாரஸ்யமான சம்பவமும் உண்டு. 

 

தனது நூலில் இளையராஜாவே சொன்னது தான்.. 

 

1984ல் குடலிறக்க அறுவை சிகிச்சை செய்து கொண்டு படுத்த படுக்கையாக இருந்திருக்கிறார் இளையராஜா. ஊட்டியிலிருந்து "ரஜினி சார் கால்ஷீட் 2 நாள் இருக்கு. ராஜா சார்கிட்டேந்து 2 பாட்டு வாங்கி கொடுத்தீங்கன்னா ஷூட் பண்ணிரலாம்" என்று இயக்குனர் ராஜசேகரிடம் இருந்து தொலைபேசி அழைப்பு வருகிறது பஞ்சு சாருக்கு..

இளையராஜாவை நேரில் சந்தித்து அவரது உடல் நலனை விசாரித்து விட்டு தயங்கி தயங்கி விஷயத்தை சொல்கிறார்... பாடினால் அடிவயிற்றிலிருந்து காற்று எடுக்க வேண்டி தையல் பிரிந்து விடும் என்பதால், விசிலடித்தே மெட்டை பாடிக்காட்டுகிறார் இளையராஜா. அங்கேயே பஞ்சு அருணாச்சலம் பாடலை எழுதி முடிக்கிறார்.. உடனே ஒளிப்பதிவு செய்யப்பட அந்தப் பாட்டு தான் 

 

"காதலின் தீபம் ஒன்று". அவசரமாக எழுதப்பட்ட பாடலாயிருந்தாலும்.. "என்னை நான் தேடித் தேடி, உன்னிடம் கண்டு கொண்டேன்" என்று ரம்மியமான வரிகளை எழுதி இருப்பார்.

 

காமம் என்பது திரைப்பாடல்களில் இலைமறைகாயாக தான் இருக்க வேண்டும் என்று நினைத்தவர் பஞ்சு சார்.. ஆனால் அதிலும் இலையுதிர்காலங்கள் நேர்ந்த பொழுதுகள் உண்டு..... அவரே

மஞ்சக் குளிக்கையிலே மதிலேறிப் பாத்த மச்சான் 

 

மாசி மாசம் ஆளான பொண்ணு மாமன் எனக்கு தான்

 

மேயிற கோழியெல்லாம் பாயிறது சரியா

 

என்றெல்லாம் கூட எழுத வேண்டி வந்தது... இவை 

 

"சினிமா என்பது ஒரு வணிகம்.. அதில் நிறைய 

 

யோசிக்காதே" என்று கடந்து போக வேண்டுமோ 

 

என்று எண்ணத் தோன்றுகிறது.

 

உச்சகட்டமாக, கடல் மீன்கள் படத்தில் "மதனி மதனி மச்சான் இல்லையா இப்ப வீட்டுல" என்று இவர் எழுதிய பாடல் கடும் எதிர்ப்புக்களை சம்பாதித்து பிறகு சென்சாரால் "மதனி என்பது மயிலே" என்றும் "கொழுந்தா என்பது குமரா" என்றும் திருத்தப்பட்டது..

 

இளையராஜா நிறைய பரீட்சார்த்த முயற்சிகளை மேற்கொண்டது இவரது பாடல்களில் தான்... நானறிந்த சிலவற்றைச் சொல்கிறேன்

 

"புள்ளிபோட்ட லவுக்காரி புளியம்பூ சீலக்காரி" என்று உத்தமபாளையம் பகுதிகளில் வழங்கி வந்த நாட்டுப்பாடல் தான் "அன்னக்கிளி உன்னைத் தேடுது".. ராஜாவின் இசையில் வந்த இந்த முதல் பாடல்.

 

திரையிசையில் முதன் முதலாக "ரீதி கௌளை" ராகம் இடம்பெற்ற "சின்னக் கண்ணன் அழைக்கிறான்.

 

இளையராஜா இசையில் வெளிவந்த முதல் ராகமாலிகை, கவிக்குயில் படத்தில் இடம்பெற்ற 

 

"ஆயிரம் கோடி காலங்களாக" (மாயா மாளவகௌளை, வகுளாபரணம், வாகதீஸ்வரி, வலஜி, சக்ரவாகம், மோஹனம், மோஹன கல்யாணி, சாருகேசி என்று எட்டு ராகங்களில் அமைந்தது)

 

தமிழ் சினிமாவில் முதல் நேரடி சிலோன் பைலா பாடலான "சுராங்கனி சுராங்கனி"

நாட்டுப்புற மெட்டில் Western Harmony யை இணைத்து உருவான "ஏரியில எலந்தைமரம்"

முதன் முதலாக Stereophonic இசையில் உருவான 

 

ப்ரியா படத்தின் அனைத்து பாடல்களும்

Unconventional Rhythm Pattern ல் உருவான "குரு" படத்தின் "நான் வணங்குகிறேன்"

இசைக்கருவிகள் இல்லாமல் வெறும் குரல்களை மட்டும் வைத்து உருவான பாடலான "மாயா பஜார் 1995" படத்தின் "நான் பொறந்து வந்தது"

இரண்டு கால்களின் Jogging சப்தத்தை தபலா வாசிக்கும் கண்ணையா மற்றும் Percussionist ஜெய்சா ஆகியோரை தொடையில் தட்டி அதன்மூலம் உருவான "பருவமே புதிய பாடல் பாடு"

இந்தப் பாடல்கள் அனைத்தையும் எழுதியவர் பஞ்சு சார் அவர்கள் தான்.. இதற்கு என் மனதில் தோன்றிய காரணம் "இந்தப் பையன் நல்லா தான்யா பண்ணுவான்" என்கிற எண்ணம் பஞ்சு சாருக்கும், தன்னை அறிமுகப்படுத்தியவர் என்பதைத் தாண்டி அதீதமாக எழுதுகிறேன் பேர்வழி என்று பாடலைக் காலி பண்ணி விட மாட்டார் என்று இளையராஜாவுக்கும் பரஸ்பர நம்பிக்கை இருந்திருக்க வேண்டும்..

 

நா.காமராசன் அவர்கள் சொன்னதைப் போல, கண்ணதாசன் தமிழுக்கு வழங்கிய கொடைகளில் முக்கியமான ஒன்று "பஞ்சு.அருணாசலம்".

நல்ல தயாரிபாளர் மட்டும் அல்ல..

நல்ல கவிஞர் & சினிமா  

ஆல் ரவுண்டர்!