வேலைக்கார சிறுமியும் —எம் ஜி ஆரும்🌹

எவ்வளவோ செய்திகள் எம்.ஜி.ஆர். பற்றி படித்தும் – கேள்விப்பட்டும் இருப்பீர்கள் …! ஒரு வீட்டு வேலைக்கார சிறுமிக்கும் — அவருக்கும் நடந்த தொலைபேசி உரையாடல் மிகவும் சுவாரசியமாக இருந்தாலும் — சிறுமியிடம் அவர் பேசும் போதும் அவருடைய வார்த்தைகளில் உள்ள கண்ணியம் –அக்கறை உற்று நோக்கத்தக்கது … அந்த உரையாடல் :–

” ஹலோ.. யாருங்க பேசறது?” இது வேலைக்காரச் சிறுமி.

” நான் எம்.ஜி.ராமச்சந்திரன் பேசுகிறேன். வலம்புரி ஜானிடம் பேசவேண்டும்”

அவர் எப்போது, யாருடன் பேசினாலும் தன் முழுப்பெயரையும் சொல்லித்தான் பேசுவாராம். அதனால் பேசுவது எம்.ஜி.ஆர் என்பது தெரியாமலே அந்த வேலைக்காரச் சிறுமி பதில் சொல்லியிருக்கிறாள்!

“அய்யா இப்பதான் ஆபீஸுக்குக் கிளம்பிப் போனாங்க”

“நீங்க யார் பேசறது?”

” நா இங்க வேலைபாக்குற பொண்ணு. அம்மா, அக்காவெல்லாம் ஊருக்குப் போயிருக்காங்க.”

“உங்க பேரு என்ன?”

“லச்சுமி”

“எந்த ஊரு?”

“தூத்துக்குடி பக்கத்துல வள்ளியூர் “

“இங்க வேலைக்கு வந்து எத்தனை வருஷமாச்சு?”

“மூணு வருஷமா இங்கதான் இருக்கேன்”

“அப்படியா? என்ன சம்பளம் கொடுக்குறாங்க?”

“அதெல்லாம் எனக்குத் தெரியாது. மாசாமாசம் ஊருக்கு அப்பாவுக்கு அனுப்பிடுவாங்க. எனக்கு சாப்பாடு போட்டு தீபாவளி, பொங்கல், கிறிஸ்துமஸ்க்கு துணி எடுத்துக் கொடுத்துருவாங்க.”

“உன்னை நல்லா வச்சுக்கறாங்களா? சாப்பாடெல்லாம் நல்லா இருக்கா?”

“ம்ம்ம்… நல்லா இருக்கும்.. அய்யாவுக்கு தினம் கறிச்சோறு செய்வாங்க. எனக்கும் கொடுப்பாங்க”

“சினிமாவுக்கெல்லாம் கூட்டிட்டுப் போவாங்களா?”

“ஆமா. லீவு நாள்ல எல்லாரும் போவாங்க. என்னையும் கூட்டிட்டுப் போவாங்க..”

“உனக்கு அய்யாவைப் புடிக்குமா, அம்மாவப் புடிக்குமா?”

“ரெண்டு பேரையுமே புடிக்கும். அய்யா எதாவது கடைக்கு அனுப்பினா மிச்சக் காசை என்னையே வச்சுக்கச் சொல்லுவாரு. சேர்த்துவைக்கிறேன்.”

“எப்ப ஊருக்குப் போகப்போற?”

“எங்க அப்பா வந்து கூட்டிட்டுப் போவாரு

இப்பதான் பொங்கலுக்குப் போயிட்டு வந்தேன். இனி தீபாவளிக்குப் போவேன். புதுத்துணியெல்லாம் அம்மா எடுத்துக் கொடுப்பாங்க..”

“சரி, அய்யா வந்ததும் நான் பேசுனதாச் சொல்லு”

“உங்க பேரு என்ன சொன்னீங்க?”

“எம்.ஜி..ராமச்சந்திரன்”

“மறுபடி சொல்லுங்க….”

“எம்.ஜி.ராமச்சந்திரன்”

அப்போதும்கூட தான் எம்.ஜி.ஆர் என்பதை அவர் சொல்லிக் கொள்ளவேயில்லை! …

இந்த உரையாடல் வலம்புரி ஜான் வீட்டு வேலைக்கார சிறுமிக்கும் — எம்.ஜி.ஆருக்கும் நிகழ்ந்தது …

இரவு வீட்டுக்குத் திரும்பிய வலம்புரி ஜானிடம் அந்த வேலைக்காரச் சிறுமி இந்த போன் விபரத்தைச் சொல்லியிருக்கிறாள். அத்தனை நேரம் உன்னிடம் பேசிக் கொண்டிருந்தது, எம்.ஜி.ஆர் என்ற விபரத்தை ஆசிரியர் அவளிடம் சொன்னபோது அதை அவள் முழுசாய் நம்பவில்லை. எம்.ஜி.ஆரின் முழுப்பெயர் அவளுக்குத் தெரியாததால், ‘அவரு எம்.ஜி.ஆருன்னு சொல்லவேயில்லையே.. எதோ ராமச்சந்திரன் ன்னுதானே சொன்னார், அய்யா பொய் சொல்கிறார்’ என்றுதான் நினைத்திருக்கிறாள். ஆனால் அடுத்தமுறை வலம்புரி ஜான், எம்.ஜி.ஆரைச் சந்திக்கப் போனபோது அந்தச் சிறுமி பற்றி விசாரித்த எம்.ஜி.ஆர் அவளிடம் சேர்ப்பிக்குமாறு ஒரு கணிசமான தொகையைக் கொடுத்து விட்டிருக்கிறார்.

அவ்வளவு பணமும் தனக்குத்தான், அதுவும் எம்.ஜி.ஆரே கொடுத்துவிட்டிருக்கிறார் என்று அறிந்தபோதுதான், சில நாட்களுக்கு முன் தன்னோடு பேசியது சாட்சாத் எம்.ஜி.ஆரேதான் என்பதை அவள் நம்பியிருக்கிறாள்.! .. என்று ” தாய் ” வார இதழில் உதவி ஆசிரியராக பணி புரிந்த திரு . கல்யாண்குமார் பதிவு செய்த்திருக்கிறார்

புரட்சி நடிகரும் , கலைச்செல்வி ஜெயலலிதாவும் இந்த ‘எங்கள் தங்கம்’ படத்தை பணம் வாங்காமல் நடித்துக் கொடுத்தனர்.

எம்ஜிஆரின் மேனி சிவக்க என்ன காரணம்னு தெரியுமா? அட கலைஞரே சொல்லிட்டாரே..!

புரட்சித்தலைவர் எம்ஜிஆர் கலைஞரின் வசனத்திலும் படங்களில் நடித்துள்ளார். மருதநாட்டு இளவரசி, புதுமைப்பித்தன், காஞ்சித்தலைவன், மந்திரி குமாரி, மலைக்கள்ளன் ஆகிய படங்களைச் சொல்லலாம். இவற்றில் மலைக்கள்ளன் படம் ஜனாதிபதி விருது வாங்கியது.

இதற்கு நன்றிக்கடனாக எம்ஜிஆரும் உதவி செய்துள்ளார் என்றே சொல்லலாம். கலைஞர் கருணாநிதியின் குடும்பத்திற்கே கஷ்டகாலம் வந்தபோது எம்ஜிஆரும், ஜெயலலிதாவும் செய்த உதவி பேசுபொருளானது. வாங்க என்னன்னு பார்ப்போம்.

வெற்றி விழா

16.1.1971 அன்று சென்னை கலைவாணர் அரங்கில் கருணாநிதி குடும்பத்தின் தயாரிப்பில் வெளியாகி நூறு நாட்கள் ஓடிய எங்கள் தங்கம் திரைப் படத்தின் வெற்றி விழா நடந்தது. இந்தக் கூட்டத்தில், கருணாநிதியும், முரசொலி மாறனும் பேசியது என்ன என்று பார்க்கலாமா…

கடன்

முரசொலி பத்திரிக்கை தொடர்ந்து நஷ்டத்தில் இயங்கியதாலும், எங்கள் குடும்பம் தயாரித்த திரைப் படங்கள் தொடர்ந்து தோல்வி அடைந்ததாலும், எங்கள் குடும்பமே கடனாளிக் குடும்பமானது. வாங்கியக் கடனுக்கு வட்டி கட்ட முடியவில்லை. வீட்டில் இருக்கும் நகைகளை எல்லாம் விற்று வட்டி கட்ட வேண்டிய சூழ்நிலை ஏற்பட்டுவிட்டது. குடும்பமே தற்கொலை செய்து கொள்ளலாம் என்கிற எண்ணம் கூட ஏற்பட்டது.

எங்கள் தங்கம்

இந்த நிலைமையை புரட்சி நடிகர் எம்ஜிஆரிடம் சொன்னேன். புரட்சி நடிகரும் , கலைச்செல்வி ஜெயலலிதாவும் இந்த ‘எங்கள் தங்கம்’ படத்தை பணம் வாங்காமல் நடித்துக் கொடுத்தனர். நடித்துக் கொடுத்தது மட்டுமின்றி, இந்தப் படத்தை வெற்றிப் படமாக ஆக்கித் தந்தனர். இந்தப் படத்தின் மூலம் வந்த லாபத்தால், அடமானத்தில் இருந்த எங்கள் சொத்துக்களை மட்டுமின்றி, எங்களது மானத்தையும் மீட்டுத் தந்தனர். அவர்களுக்கு எங்கள் குடும்பம் என்றென்றும் நன்றிக் கடன் பட்டுள்ளது என்றார் முரசொலி மாறன்.

கொடுத்து கொடுத்து சிவந்த கரம்

அடுத்து கருணாநிதி இப்படி பேசினார். மாறன் பேசும் பொழுது, புரட்சி நடிகர் மற்றும் கலைச்செல்வி ஆகியோர் செய்த உதவியை இங்கே குறிப்பிட்டார். கொடுத்து கொடுத்துச் சிவந்தக் கரம் கர்ணன் என்று சொல்வார்கள். ஆனால் எங்கள் திராவிடக் கர்ணன் புரட்சி நடிகருக்கோ, கொடுத்து கொடுத்து மேனியே சிவந்து விட்டது.

கொடுத்து கொடுத்து சிவந்த கரம் உள்ள புரட்சி நடிகர் வாழ்கின்ற காரணத்தினால் தான் அவர் வாழும் மாவட்டத்திற்கு செங்கை மாவட்டம் என்று என பெயர் வந்தது. நன்றி மறப்பது நன்றன்று என்று வள்ளுவனின் வாக்கிற்கேற்ப மாறனின் நன்றியுணர்ச்சியை நானும் வழிமொழிகிறேன் என்றார்.

Live Tamil news

டி.எம்.சௌந்திரராஜன்!

 

சைக்கிளில் சுற்றிய என் வீட்டு வாசலில் 10 கார்கள் நிற்க காரணம் அந்த நடிகர் தான்: யாரை சொன்னார் டி.எம்.எஸ்?

 

தனது வெண்கல குரலின் மூலம் பல ஹிட் பாடல்களை கொடுத்துள்ள பாடகர் டி.எம்.சௌந்திரராஜன் தனது வாழ்க்கையை உயரத்திற்கு கொண்டு சென்ற நடிகர் குறித்து பேசியுள்ளார்.

தமிழ் சினிமாவில் வெண்கலகுரல் மன்னன் என்று போற்றப்படும் டி.எம்.சௌந்திரராஜன், சினிமாவில் பாடகராக வாய்ப்பு கிடைத்தாலும், ஒரு சில பாடல்கள் மட்டுமே பாடிக்கொண்டிருந்த சைக்கிளில் சென்றுகொண்டிருந்த என் வீட்டு வாசலில் 10 கார்களை நிறுத்த உதவியர் இந்த நடிகர் என்று கூறியுள்ளார்.

1954-ம் ஆண்டு ஆர்.எம்.கிருஷ்ணசாமி இயக்கத்தில் வெளியான படம் தூக்கு தூக்கி. சிவாஜி, லலிதா பத்மினி ஆகியோர் இணைந்து நடித்திருந்த இந்த படத்திற்கு, ஜி.ராமநாதன் இசையமைத்துள்ளார். அப்போது முன்னணி நடிகர்களாக இருந்த எம்.ஜி.ஆருக்கு சீர்காழி கோவிந்தராஜனும், சிவாஜிக்கு சி.எஸ்.ஜெயராமனும் பாடிக்கொண்டிருந்தனர். இதன் காரணமாக ஓரிரு பாடல்கள் மட்டுமே டி.எம்.எஸ்க்க்கு கிடைத்துள்ளது.

அதேபோல் எம்.ஜி.ஆர் சிவாஜி இருவரும் இணைந்து நடித்த ஒரே படமாக கூண்டுக்கிளி படத்தில் 4 பாடல்கள் பாடியிருந்தார். இதனிடையே தூக்கு தூக்கி படத்தில் பாடுவதற்காக டி.எம்.எஸ்.க்கு வாய்ப்பு கிடைத்து அவரும் பாடல் பதிவுக்காக சென்றுள்ளார். 1952-ம் ஆண்டு பராசக்தி படத்தின் மூலம் சினிமாவில் அறிமுகமாக சிவாஜிக்கு, சி.எஸ்.ஜெயராமன் தான் பாடல்கள் பாடி வந்துள்ளார். ஆனால் இந்த படத்தில் பாடுவதற்காக அவர் அதிக சம்பளம் கேட்டதால், படக்குழு டி.எம்.எஸ்க்கு வாய்ப்பு கொடுத்துள்ளது.

இந்த பாடலை பாட வந்தபோது, சிவாஜி, எனக்கு சி.எஸ்.ஜெயராமன் தான் பாடிக்கொண்டிருக்கிறார். அவர் பாடினால் தான் நன்றாக இருக்கும் வேறு பாடகர்கள் வேண்டாம் என்று கூறியுள்ளார். இதனால் அதிர்ச்சியான படக்குழுவினர் இதை டி.எம்.எஸிடம் சொல்ல, இந்த படத்தில் பாட வேண்டும் என்று விதி இருந்தால் பாடுகிறேன் என்று சொல்லிவிட்டு, நான் இந்த படத்தில் 3 பாடல்கள் இலவசமாக பாடி தருகிறேன். அதை நீங்கள் சிவாஜியிடம் போட்டு காட்டுங்கள். அவர் சம்மதம் சொன்னால் பாடுகிறேன்.

மாறாக சிவாஜி இந்த பாடல் பிடிக்கவில்லை என்று சொன்னால், எனக்கு தெரிந்த வேலையை பார்த்துக்கொள்கிறேன் பாடமாட்டேன் என்று கூறியுள்ளார். இதை ஏற்றுக்கொண்ட படக்குழு, டி.எம்.எஸ் குரலில் 3 பாடல்களை பதிவு செய்து அதை சிவாஜிக்கு போட்டு காட்டியுள்ளனர். முதலில் சாதாரணமாக கேட்க தொடங்கிய சிவாஜி பின்னர் பாடலை தாளம் போட்டு பாடலை ரசிக்க தொடங்கியுள்ளார். பாடல் முடிந்த பின் இதை யார் பாடியது என்று கேட்க, மதுரையில் இருந்து வந்திருக்கிறார் பெயர் சௌந்திரராஜன் என்று அறிமுகம் செய்து வைத்துள்ளனர்.

அப்போது டி.எம்.எஸ்ஐ அழைத்த சிவாஜி, நல்ல பாடியிருக்கீங்க, இந்த படத்தில் மற்ற அனைத்து பாடல்களையும் நீங்களே பாடுங்க என்று கூறியுள்ளார். 11 பாடல்கள் உள்ள இந்த படத்தில் 8 பாடல்களை டி.எம்.எஸ். பாடியிருந்தார். இந்த படம் வெற்றியடைந்து டி.எம்.எஸ்.க்கு நல்ல பெயரை பெற்று தந்த நிலையில், இதுவரை வாடகை சைக்கிளில் சென்றுகொண்டிருந்த டி.எம்.எஸ். வீட்டை நோக்கி தயாரிப்பாளர்கள் கார்கள் படையெடுக்க தொடங்கியுள்ளது.

தனது வாழ்க்கை தூக்கு தூக்கி படத்திற்கு முன் பின் என்று இரண்டாக பிரிக்கலாம் என்று டி.எம்.சௌந்திரராஜன் ஒரு பேட்டியில் குறிப்பிட்டுள்ளார்.

கமலுக்கும் ரஜினிக்கும் குணத்தில் என்ன வேறுபாடு?

கமல் நிஜத்தில் நாத்திகம் பேசுவார். ஆனால் படங்களில் ஆன்மீக தலைப்புகள் தான் வைப்பார். உதாரணமாக விஸ்வரூபம், தசாவதாரம், ஹேராம், அன்பே சிவம், என்று தான் பெயர் வைப்பார்.

கமல் வாழ்க்கை மிகவும் வெளிப்படையானவர். அவரது வாழ்வில் தான் எத்தனை கதாநாயகிகள். ஆனால் எதுவுமே கடைசி வரை நிலைக்கவில்லை. புன்னகை மன்னன் கடைசி வரை முரட்டு சிங்கள் தான்.

பிக்பாஸ் நிகழ்ச்சியில் கமல் ஏழு சீசன்கள் வரை தொகுத்து வழங்கியுள்ளார். எனக்கு தெரிந்து கமல் அவர்கள் பிக்பாஸ் நிகழ்ச்சியில் நியாயமாக பேசியது கிடையாது. உதாரணமாக சமீபத்தில் வினுஷா அவர்களை பற்றிய உருவ கேலியை பற்றி கேட்கவும் இல்லை, கண்டிக்கவும் இல்லை. அதேபோல் தனக்கு வேண்டிய நபர்கள் சக்தி வாசு, வனிதா விஜயகுமார், காயத்ரி ரகுராம், விக்ரமன், மாயா, போன்ற ஆட்கள் தவறே செய்தாலும், கண்டிக்க மாட்டார். இதே சாமானியர் செய்தால் தண்டனை கொடுப்பார். மய்யம் நியாயமாக இல்லை.

கமல் அவர்கள் சினிமாவில் மட்டும் அல்ல நிஜத்திலும் சிறந்த அறிவாளி தான். குறிப்பாக அரசியல் களத்தில் தைரியமாக தனித்து நின்றார். ஆரம்பத்தில் திமுகவை எதிர்த்தார். கடைசியில் டார்ச்சி லைட் அணைத்து விட்டு திமுகவிற்கு காவடி எடுத்து வருகிறார். இதற்கு பேரு தான் பகுத்தறிவு போல…

ரஜினிகாந்த் அவர்கள், தனது கருத்தை தைரியமாக பேசுவார். பின்விளைவுகள் பற்றி கவலைப்படாமல் பேசுவார். கமல் அவர்களை விட தைரியம் ரஜினிகாந்த் அவர்களுக்கு சற்று அதிகம். உதாரணமாக நடிகர் திலகம் சிவாஜி கணேசன் அவர்களுக்கு பாராட்டு விழா ஜெயலலிதா தலைமையிலான அதிமுக ஆட்சியில் நடைபெற்றது. அதில் பாராட்டு உரை ரஜினிகாந்த் அவர்கள் முதல்வர் ஜெயலலிதா அவர்களை நேரிடையாக விமர்சனம் செய்தார்.

பாட்சா படவிழாவில் ஜெயலலிதா அவர்கள் மீண்டும் ஆட்சிக்கு வந்தால் தமிழகத்தை ஆண்டவனாலும் காப்பாற்ற முடியாது என்றார். கலைஞர் கருணாநிதி முன்னிலையில் தமிழக அரசின் இலவச திட்டங்களை விமர்சனம் செய்தார். பாச தலைவனுக்கு பாராட்டு விழாவில் அஜீத் அவர்களை எழுந்து நின்று ஆதரித்தார். இதைவிட தைரியம் வேண்டுமா?

ரஜினிகாந்த் அரசியலில் வராமல் இருப்பதற்கு ஒரே காரணம். அவர் தமிழர் இல்லாத காரணத்தால் மட்டும் அல்ல. அவரது குடும்பம் அவரது அரசியல் பொது வாழ்க்கைக்கு ஒத்துழைப்பு கொடுக்க மாட்டார்கள். மேலும் அரசியலுக்கு வருவதும் வராததும் அவரது தனிப்பட்ட விருப்பம். இதில் கருத்து சொல்ல நமக்கு உரிமை இல்லை.

கமல் திரையில் மட்டும் அல்ல நிஜத்திலும் நடிப்பார். ரஜினிகாந்த் திரையில் மட்டும் தான் நடிப்பார். குணத்தில் கமலை விட ரஜினிகாந்த் தான் பன்மடங்கு சிறந்தவர். இது மக்களுக்கே நன்றாக தெரியும். என்னை பொறுத்தவரை மக்கள் திலகமும் நடிகர் திலகமும் ரஜினிகாந்த் ஒருவர் மட்டுமே ஆகும்.

நாகேஷும் , பாலச்சந்தரும் - எஸ்.பி.முத்துராமன் சொன்ன தகவல் !

 

“ஒரு நல்ல நண்பன்

நூறு உறவினர்களுக்குச் சமம்.”

இந்த வரிகளை வாசித்தபோது,

மனதுக்குள் ஏனோ

மறைந்து போன நாகேஷும் , பாலச்சந்தரும் வந்து போனார்கள்.

நாகேஷ் தன் முதல் மகன் ஆனந்த் பாபு பிறந்த சமயத்தில், அந்தக் குழந்தையைப் போய்ப் பார்க்க விரும்பவில்லையாம்.

பாலச்சந்தர் கேட்டாராம்.

'நாகேஷ்... இன்னும் நீ உன் குழந்தையைப் போய் பார்க்கவில்லையா..?”

“இல்லை” என்று மெல்லிய குரலில் சொன்னாராம் நாகேஷ்.

“ஏன்..?”

சில நொடிகள் அமைதிக்குப் பின், தழுதழுத்த குரலில் நாகேஷ் சொன்னாராம் :

“கொஞ்சம் என் முகத்தைப் பாருங்கள். முழுவதும் அம்மைத் தழும்புகள்... இந்த முகத்தோடு போய் நான் என் குழந்தையைப் பார்த்தால்...

அந்த சின்னஞ்சிறு குழந்தை பயந்து விடாதா ? அதனாலேதான் நான் போய் என் குழந்தையை பார்க்க விரும்பவில்லை.”

கண்ணீர் ததும்பும் கண்களோடு நாகேஷ் இப்படிச் சொல்லவும்

கலங்கிப் போய் விட்டாராம் பாலச்சந்தர் .

கொஞ்ச நேரத்துக்குப் பின், நண்பன் நாகேஷை சமாதானம் செய்தாராம்.

“நாகேஷ்...

உனக்கு உன் நடிப்புத்தான் அழகு...

கவலைப்படாதே !

முதலில் போய் உன் குழந்தையை பார்த்து தூக்கி கொஞ்சி விட்டு,

அப்புறம் ஷூட்டிங்குக்கு வா...” என்று உற்சாகம் கொடுத்து அனுப்பி வைத்தாராம் பாலச்சந்தர்.

(சில ஆண்டுகளுக்கு முன் நடந்த ஒரு திரைப்பட விழாவில்,

இயக்குனர் எஸ்.பி.முத்துராமன் சொன்ன தகவல் இது)

இவ்வளவு துன்பங்களையும் , துயரங்களையும் மனதில் தேக்கி வைத்துக் கொண்டுதான்,

நம்மையெல்லாம் சிரிக்க வைத்திருக்கிறார் நாகேஷ் !

ஆம்.

“சிரிப்பவர்கள் எல்லோரும் கவலை இன்றி வாழ்பவர்கள் இல்லை ;

கவலையை மறக்க கற்று கொண்டவர்கள் !”